BAGUIO CITY–Irekreklamo ti maysa a negosyante dagiti personnel ti Public Order and Safety Division (POSD) iti Baguio City gapu iti maatap a panagkiddawda kenkuana iti kuarta idi napalabas a paskua, saan a patas a panangtratoda kenkuana ken panangpangtada kenkuana.
Iti reklamo iti Bombo Radyo Baguio ti negosyante a ni Eugene Galang a residente iti Lower Magsaysay, kinunana a nangrugi ti nasao nga insidente idi pay Disyembre 2020 kalpasan a nagkiddaw kenkuana iti “pamaskua” dagiti tallo a miyemgro ti POSD.
Kinunana a P1,000 wenno nasursurok pay ti kidkiddawen kenkuana dagiti miyembro ti POSD ngem P500 laeng ti impaayna agsipudta naapektaran ti negosyona iti pandemya ken kayatna nga ipangpangruna a tulongan dagiti trabahador daytoy.
Dinakamatna a kalpasan ti nasao nga insidente ket kanayon nga agturturong sadiay dagiti kameng ti POSD a mangsitsitar ken mangpapaikkat kadagiti kostumerda nga uray apagbiitda laeng nga agparparada iti sango ti pwestoda, bayat a saanda met a sitsitaren dagiti kaabayna a pwesto uray no adda ti malablabsing dagitoy a pagalagadan.
Imbinglayna nga idi Pebrero 8, 2021 ti kaudian a panagsitar dagiti POSD enforcers iti pwestona a nangitunda iti panakisinnungbatna iti maysa kadagitoy gapu iti panangpaikkatda iti lugan dagiti kustomer dagitoy.
Innayonna a nagturong daytoy iti opisina ti POSD tapnu agdawat ti pammalawag ngem saanda nga inasikaso daytoy ken impabatida laeng ti cellphone number-na.
Kalpasanna daytoy ket nakaawat metten ni Galang iti text messages ken awag a maatap a nagtaud kadagiti POSD personnel a mangibagbaga kenkuana a saannan nga ituloy nga agreklamo gaputta awan metlang ti pagbanagan daytoy ken agpeggad laeng ti biagna.
Gapu iti daytoy, nangipila ni Galang iti reklamo iti Civil Service Commission ngem agingga ita ket awan pay laeng ti resulta daytoy isu’t gapuna a nagturong manen iti opisina ti POSD tapnu agreklamo ngem saanda latta nga inasikaso daytoy.
