BAGUIO CITY – Nagpalawag ti indibidual iti viral video a sinitar ni Public Order and Safety Division (POSD) head Marvin Herrera ken impeksana ti sakit ti nakemna iti napasamak a panagsinnungbatda.
Iti panakiyuman ti Bombo Radyo Baguio, kinuna ti vendor a kabayatan ti kaaddana iti palengke ket manarimaan met ti panagpalpalagip dagiti personnel ti POSD kadagiti pagalagadan kontra iti COVID-19.
Kinunana a ditoy nga adda ti nangngegna a nangipukkaw iti termino a ‘kalaban’ ken sadiay metten a naka-unget ni Herrera ken nagpukpukaw agingga nga immasideg kenkuana.
Sigun kenkuana, pinukawan daytoy ni Herrera ken imballaag daytoy ti panangkumpiskar iti business permitda.
Impetteng ti nasao a vendor nga awan met ti inaramidda a panaglabsing ken inkalinteganna nga awan ti dakes iti inaramidna gaputa inlabana laeng ti karbengana malaksid pay nga awan ti linabsingna a health protocols gaputa nakasuot iti facemask, faceshield ken adda ti social distancing dagitoy.
Nupay kasta, innaklona a no mamingsan ket saan a maliklikan ti saan a panakasurot ti social distancing iti uneg ti palengke gapu iti kaado ti tattao ken kinailet ti espasyo dagiti pwesto ken pasaray nga ingatoda ti faceshield-da gapu iti kabara ti panawen ken marigatanda nangruna no adu ti tao.
Inyunay-unay pay ti maseknan a vendor a saan a daytoy ti nagipukkaw iti ‘kalaban’ ken napagbiddutan laeng daytoy.
Kinunana pay nga addan ti panagamakna ken ti pamilyana gaputa arigna a pinangtaan daytoy ni Herrera kalpasan nga insawang ti dadaulo ti POSD ti pannarita a “machambaan lang kita minsan.”
