BAGUIO CITY – Impetteng ni Judge Roberto Mabalot a saan daytoy a nakibiang iti kaso ti taxi driver a nangdarundun iti maysa a pulis a traffic enforcer sadiay Abanao Street, Baguio City idi kalman.
Iti eksklusibo a panakiyuman ti Bombo Radyo kenkuana, kinunana a napan laeng daytoy sadiay Station 7 ti Baguio City Police Office tapnu kumpirmaren no ma-impound ti ‘J Mabalot Taxi’ a taxi unit ti kabagianna nga imanmaneho ti nakemmeg a driver a ni Jone Buclay.
Dinakamatna nga idi napan daytoy iti istasyon ti pulisya ket saan a nagpabigbig kas maysa a judge ken nagkablaaw pay daytoy idi simrek iti istasyon.
Sigun kenkuana, umuna a dinamagna iti driver ti ayan ti tulbek ti taxi ken binalakadanna laeng ti driver iti saan daytoy a panangited iti aniaman nga statement idi saan daytoy a nakasungbat iti dinamagna no al-alaan daytoy dagiti pulis iti statement.
Dinamagna met no anya ti kaso ni Buclay ken sadiay nga indisso dagiti pulis iti abay ti driver ti resulta dagiti nagpostibo a tests daytoy.
Kinuna ni Judge Mabalot nga idi nakitana a nagpositibo dagiti resulta ti tests ni Buclay ket inung-untanna daytoy iti sangwanan dagiti pulis gapu iti panagmaneho daytoy nga adda iti impluwensia ti arak.
Dinakamatna nga impalawagna laeng kenni Buclay a saan daytoy a maibalud ken saan a ma-impound ti taxi gaputa multa laeng ti pannusa ti reckless driving a namarkaan iti naited a citation ticket.
Sigun pay kenkuana, pimmanawda iti istasyon ti pulisya kalpasan a maysa kadagiti pulis ti nangkuna nga awanen ti sumaruno a proseso a pakaipasidongan ti nakemmeg a taxi driver ken nagpayapay kadakuada ti senior officer sadiay.
Kabayatanna, ad-adalen ita dagiti annak ni Judge Mabalot ti panakaipila ti kaso a cyber libel ken panaglabsing iti Anti-Bastos Law kadagiti basher daytoy kalpasan a nababalaw daytoy idi rimwar ti naganna iti insidente.
Iti interview ti Bombo Radyo, kinunana a panangdadael iti naganna ti inaramid dagiti nasao a bashers gapu ‘presumptuous’ dagiti komento dagitoy.
Inyunay-unayna a maymaysa laeng ti taxi unit a tagikua ti Mabalot ken saan a daytoy ti operator ngem ketdi, kabagianna ti operator ti maseknan a taxi.
Impettengna nga adda ti basol ti taxi driver isut gapuna nga inung-ungtanna daytoy ken saan a nakibiang iti kaso gaputa trabahona ti mangdesisyon iti kaso ken ti agbalin a patas.
Dinakamat pay ni Judge Mabalot a nagipatulod daytoy iti personal a mensahe iti facebook page ni Mayor Benjamin Magalong ken ditoy nga inlawlawagna ti dasigna iti insidente ken pinaglibakanna ti naidanun iti mayor a maatap a panakibiangna iti kaso.
Immunan a naipablaak iti nasao a social media page ni Mayor Magalong ti panakairaman ni Judge Mabalot iti imbestigasyon iti kaso gapu iti maatap a panakibiang daytoy iti kaso a nagresulta tapnu ma-release ti nakemmeg a taxi driver ken ti taxi unit nga uray saan pay a naipasidong iti inquest proceedings.
