BAGUIO CITY – Bimmaba ti labor force participation rate ti rehion Cordillera iti pakabuklan a labor force ti pagilian kas maibasar iti kaudian a survey ti Philippine Statistics Authority (PSA) kadagiti mangmangged ditoy rehion.
Sigun kenni Aldrin Federico Bahit Jr., Statistical Operations and Coordination Division Chief ti PSA-Cordillera, nagbalin a 62 percent ti participation rate ti rehion iti labor force ti pagilian.
Kinunana a nababbaba daytoy iti 3.5 percent no idilig iti 65.9 percent a participation rate ti rehion iti labor force ti pagilian idi napalabas nga April 2016.
Dinakamatna a naisayangkat ti nasao a survey kadagiti agtawen iti 15 nga agpangato gaputa adda metten dagiti agtutubo a nasapa a mangmangged ditoy rehion gapu iti kinakurapay.
Naamuan pay a dumanon iti 38 percent manipud iti popolasyon ti Cordillera ti awanan pay laeng iti panggedan.
Kinuna ni Bahit a dagitoy ket dagiti katurpurposna laeng iti kolehiyo, dagiti agsapsapol paylaeng iti panggedan ken sumagmamano ket addaan ti sagubanit a rason tapnu saanda a makatrabaho.
