Agtultuloy a mapapabileg ken maing-ingetan ti partnership ti pagadalan ken Tuba Municipal Police Station.
Daytoy ket kalpasan nga opisyal nga inturnover ti kapulisan dagiti sumagmamano a taekwondo training gears iti Tuba Central National High School kas donasyon.
Sigun iti kapulisan, daytoy ket paset ti “BUNTAL: PANSEGSHAN NI AANAK” project ken ti Junior Peer Advocates Bullying (JPAAB) program.
Panggep ti “BUNTAL: PANSEGSHAN NI AANAK” a mang-empower ken mangsalwad kadagiti ubbing babaen iti police community ken school partnerships.
Malaksid iti dayta, maitandudo pay ti sports kadagiti estudyante tapno maliklikan dagitoy ti bisyo ken dadduma pay a saan a nasayaat a bambanag.
Kabayatanna, panggep met ti Junior Peer Advocates Bullying (JPAAB) program a maprebentaran ti bullying iti uneg ti pagadalan ken maitandudo metlaeng ti safe, secure, ken child friendly learning environment no sadino, babaen kadagiti initiatiba ti kapulisan, maengganyo ken masurwan dagiti ubbing nga agbalin nga aktibo a mangi-advocate iti respeto, disiplina, ken natalna wenno naalumanay a panangsolbar kadagiti apa kadagiti kakaduada nga estudyante.
Maipalagip nga idi napalabas a bulan, naipatungpal ti Memorandum of Agreement iti nagbaetan ti nasao a pagadalan ken kapulisan seknan iti nasao a programa.
Inyebkas met ti Tuba Central National High School ti panagyamanda. Sigun kenni Claire Lamsis, Master Teacher 2 ti nasao a pagadalan, maaramat dagiti naidonar a banag para iti panagensayo dagiti estudyante para iti self-defense dagiti ubbing.
