Inaklon ti Commission on Elections a saanda a kabaelan a lapdan ti iseserrek dagiti kontraktor ken dagiti agtakem manipod iti political dynasty iti party-list system.
Sigun kenni COMELEC Chairperson Atty. George Erwin Garcia, iti paglintegan iti Pilipinas, nagbalinen a paglusutan daytoy nu sadino, uray dagiti nababaknang a negosyante ket mangar-aramat iti daytoy tapno makastrek iti Kongreso.
Gapu iti dayta, impetteng ni Atty. Garcia a kasapulan ti panakaamyendar ti Party-list Law iti Pilipinas nu sadino, rumbeng a makita dagiti partikular a sektor a pakaibasaran dagiti mabukel a party-list groups ken organisasyon.
Innayon ni Atty. Garcia a ti laeng Kongreso ti addaan iti bileg a mang-amyendar iti nasao a paglintegan tapno maisubli ti pudno a tarigagay ken panggep daytoy a mangibagi kadagiti nakukurapay ken kadagiti saan a mangmanggegan ti arungaingna.
Ti Party-list Law a dekada itan a maipatpatungpal ket patien ni Atty. Garcia a saanen nga agserserbi iti pudno a panggepna nu sadino, naibaw-ing daytoy para iti interes dagiti mananggundaway a grupo.
