Indagadag ni Surigao del Sur Representative Johnny Pimentel kenni President Ferdinand “Bongbong” Marcos Jr. a mangtignay iti Intelligence Service ti Armed Forces of the Philippines tapno tumulong kadagiti civilian law enforcement iti panagurnong iti impormasion kontra kadagiti kidnapping syndicates.
Iti panangdakamatna iti 1987 Constitution, inlawlawagna a ti Presidente, kas commander-in-chief ti AFP, ket addaan iti bileg a mangimandato ti military operations, agraman dagiti aktibidad ti intelligence, kadagiti banag a mainaig iti internal security ken public order.
Kinunana pay a bayat nga agtaltalinaed ti PNP a lead agency iti panangmintinir ti internal peace and order iti pagilian, mabalin latta nga usaren ti military intelligence nu pakaseknan ti seguridad ti kaadduan.
Ti nasao a banag ket kinuna ti nasao nga opisial kasaruno ti kaudian a kidnapping ken pammapatay iti negosiante a ni Anson Que ken ti driver daytoy a ni Armanie Pabillo.
Dagiti tallo a suspek iti pammapatay kenni Que ken Pabillo ket adda iti kostodiya ti Philippine National Police Anti-Kidnapping Group kalpasan a dua kadagitoy ti natiliw idiay Palawan idi Abril 18, bayat a ti maysa a suspek ket simmuko kalpasan ti maysa nga aldaw.
Iti agdama, manarimaan ti panagsapul ti Philippine National Police iti mastermind iti likudan ti kidnapping ken pammapatay iti dua a biktima.
