Inaklon ni Baguio City Mayor Benjamin Magalong a naklaatda iti kaadda dagiti organizers iti Session Road a maatap nga agsingsinger iti nalabes a gatad(overcharge) kadagiti aglaklako wenno participating stall owners tunggal adda ti maangay nga aktibidad iti Sunday Pedestrianization.
Kalpasan ti assessment nga insayangkat ti city government, kinuna ni Mayor Magalong nga agparparang a naawananda ti control iti Session Road Pedestrianization tunggal Dominggo ngem naisubli metlaengen kadakuada daytoy rason a naituloy metlaeng ti aktibidad idi napan a Dominggo.
Sigun kenni Mayor Magalong,maysa a panggep ti Sunday Pedestrianization iti Session Road ti panakaipaay iti gundaway tapno maitandudo dagiti government activities, maiyasideg iti publiko dagiti nagduduma a programa ken serbisyo dagiti ahensya ken daduma pay nga organisasyon, ken tapno maksayan ti carbon emission nga agtataud kadagiti luglugan.
Innayonna a ti bilang dagiti stalls idiay Session Road tunggal Domingo ket nakadepende iti kalawa iti lugar nu sadino, maipangpangruna dagiti stalls manipod kadagiti programa ti gobyerno ken nagduduma nga ahensya.
Nupay napanggep ti temporaryo a panakasuspindir dagiti aktibidad iti Session Road idi Dominggo, naituloy metlaeng daytoy nu sadino, immunan nga inikkatda dagiti organizers.
Mainaig iti dayta, kinuna ti mayor nga agtultuloy latta dagiti aktibidad iti pedestrianization idiay Session Road kadagiti sumarsaruno a Domingo depende kadagiti programa dagiti government agencies.
Inyunay-unayna a kasapulan dagiti negosyante ti direkta a panakisarita iti city government tapno maipaayan dagitoy iti gundaway a makipaset iti Sunday activities iti Session Road nu sadino daytoy ti mangpababa iti gatad ti panagrentada ti pwesto iti nadakamat a lugar.//Bombo Jez Lapizar
