BAGUIO CITY – Mangikabil ti lokal a gobyerno ti Baguio City iti basuraan kadagiti mabigbig a disso iti depaar ti Session Road tunggal mairikep daytoy iti aldaw ti Dominggo.
Sigun kenni Mayor Benjamin Magalong, kalpasanna ket obserbaranda ti panagtungpal dagiti agturturong ken magmagna sadiay iti umno a panangibelleng iti basura dagitoy.
Agbalin nga addang daytoy ti lokal a gobyerno ti Baguio kalpasan a naobserbaranda ti masansan a panakaiwara ken panaka-urnong dagiti basura iti kaaduanna a paset ti Session Road tunggal adda dagiti aktibidad a maisayangkat sadiay iti aldaw ti Dominggo.
Impetteng ti mayor a no saan latta a madisiplinaan dagiti tattao iti panangibellengda iti basurada kagiddan ti panagdar-ayda kadagiti aktibidad sadiay Session Road iti dinominggo ket mapilitan ti lokal a gobyerno a mangisardengen iti pedestrianization ti nasao a kalsada.
Naamuan nga uray nagnayon ti City General Services Office iti streetsweepers ken garbage truck nga agdalus iti Session Road kalpasan dagiti aktibidad sadiay tunggal Dominggo ket adu latta kadagiti umili ken turista ti agibelbelleng iti basurada iti saan nga umno a disso kas kadagiti plant boxes.
Naituding nga agleppas ti pedestrianization ti Session Road inton sumaruno a bulan ti Disyembre.
