BAGUIO CITY – Maitampok ti istorya ti kinabanuar daydi 2LT RALF AMANTE ABIBICO iti HIMAMAYLAN: A Kagitingan Film a maipabuya iti publiko inton Sabado, June 12, Araw ng Kalayaan.
Maipalagip a maysa ti banuar manipud Mount Data Cliff, Monamon Sur, Bauko, Mountain Province kadagiti tallo a soldado a napasag iti panaki-engkwentro ti tropa ti gobyerno kadagiti rebelde a New People’s Army sadiay Carabalan, Himamaylan City, Negros Occidental idi April 19, 2020.
Manarimaan ti panangipaayda ti seguridad bayat ti panangiwaras ti DSWD ti tulong kadagiti umili iti sidong ti Social Amelioration Program idi nagrespondeda iti report seknan iti panagkikil dagiti rebelde kadagiti umili.
Dandanin maabak dagiti rebelde idi nagaramatda ti improvised explosive device ken granada a nangitunda iti dakkel a pukaw iti tropa ti gobyerno.
Ni 2LT Abibico ket miembro ti PMA ALAB TALA Class of 2018 ken pimmusay iti tawenna a duapulo ket tallo.
Akmen met ni PFC Sherwin Bam Mendoza ti karakter daydi 2LT Abibico.
