Imbinglay ni Rhokson Kimakim, Pro Body Builder -IFBB Pro a nasayaat met ti nagbalin a performance dagiti atlet nga in-coach na iti kaleplepas laeng nga Asia Grand Prix (AGP) Regionals a naangay idiay Sta. Cruz, Manila itay nabiit.
Sigun kenni Kimakim, impakita met dagiti atleta manipud probinsya ti Benguet ti kabelanda iti nasao a pasalip.
Nagbalin ni Kimakim kas atleta iti tay-ak iti bodybuilding ngem ita a gundaway, nagserbi daytoyen kas coach dagiti atleta a nakipaset iti nasao a pasalip. s
Imbinglayna a maysa kadagiti atleta a ni Jeun De Leon ti nakagun-od iti 2nd Place iti Pro Qualifier ken Overall Fit Model AGP Regionals bayat.
Nagun-od met ni Thomas Jay Rufino ti 2nd Place iti dua a Division bayat a naala met ni Carl Yu ti Top 4, Top 2, ken Top 3 iti tallo a nagduduma a divisions.
Imbinglay ni Kimakim a kas coach dagiti nasao nga atleta, tinutokanna amin dagiti atleta na tapno sumurotda kadagiti nagduduma a training program.
Kabayatanna, imbinglay ni Kimakim a maysa kadagiti sangsanguenda a karit ita ket ti kinakurang dagiti supplements nga aramatenda. Nupay kasta, impettengna nga adda met dagiti pamuspusan nga ar-aramidenna tapno maipaay dagitoy.
Imbinglayna pay a nu maipapan iti nasao a pasalip, adda iti top dagiti Igorot gapu iti bagi da. Sigun kenkuana, para iti body building ti bagi dagiti Igorot.
“The Igorot body is made for Bodybuilding,” sigun kenni Kimakim.
Iti baet dayta, impettengna a nu naan-anay laeng ti maipaay a suporta iti nasao a tay-ak, addu dagiti mabalin nga agbalin a professional iti nasao a pasalip.
Sigun kenkuana, maysa nga arapaapna a maipaayen met kuma ti suporta ti bodybuilding tapno adadda a mapasayaat pay dagiti atleta iti rehiyon.
Kinidaw met daytoy iti gobyerno a nu mabalbalin ket suportaranda met ti nasao a tay-ak gapu ta patienna a kabaelan dagiti Cordillerans a makipaset iti nasao a tay-ak.
Ginuyugoyna met dagiti atleta nga agrugrugi pay laeng nga ituloyda ti pannakipasetda iti nasao a tay-ak.
Ti Asia Grand Prix (AGP) ket maysa a nalatak a body building competition a maipatpatungpal kadagiti nagduduma a siudad ti Asia.
