BAGUIO CITY – Binabalaw dagiti konsehal ti Baguio ti performance wenno panagtrabaho dagiti security guards kadagiti nagduduma a parke ditoy siudad.
Sigun kenni Councilor Faustino Olowan, arigna naka-‘relax’ dagiti nasao a gwardiya a mangituntunda iti saan a nasayaat a panagtrabaho dagitoy nangruna ta posible narwamda iti parke a nakadestinuanda.
Gapu iti daytoy, kiniddawna ti panangsukat ti City Environment and Parks Management Office (CEPMO) iti security agency a naka-iggem kadagiti parke no saan ket dua lattan a security agency ti alaenda.
Impettengna a panawenen tapnu masukatan met ti nasao a security agency gaputa kanayon a mairekreklamo ti saan a nasayaat a panagtrabaho dagiti gwardia daytoy.
Impalawag met ni Cordelia Lacsama, dadaulo ti CEPMO a kasapulan a maipasidong iti bidding ti nasao a banag ken saan a kas karina a manayunan latta dagiti gwardia kadagiti parke gaputa adda ti proseso a nasken a matungpal.
Naamuan a ti Interlink Security Agency ti mangipapaay ti seguridad kadagiti parke iti siudad ken nasurok 10 a tawen a nagserbi daytoy iti Baguio.
Kabayatanna, binabalaw met ni Councilor Edgar Avila dagiti gwardiya sadiay Botanical Garden gaputa saanda a tumultulong iti Public Order and Safety Division a mang-abog kadagiti illegal vendors sadiay.
Kinunana a nabayagen nga ipalpalagipda daytoy iti CEPMO ngem agingga ita ket awan pay ti aksion ti nasao nga opisina.
Impanamnama met ni Lacsamana ti panakipatangda iti maseknan a security agency.
