Inlawlawag ni Senate President Vicente “Tito” Sotto III nga awan pay ti permanente a dinutukanda nga agbalin a dadaulo iti Senate Blue Ribbon Committee kasaruno ti panaglusulos ni Senate President Pro Tempore Panfilo “Ping” Lacson.
Sigun kenni Senator Sotto, kasapulanda pay ti agtataripnong iti Senado tapno matalantan dagiti posibilidad.
Manamnama a maangay ti taripnong inton sumangpet ni Senator Erwin Tulfo manipod iti opisyal a panagbiahe daytoy idiay abroad.
Iti agdama, ni paylaeng Senator Erwin Tulfo ti agserserbi kas acting chairperson iti nasao a komite gapu ta daytoy ti vice chairperson.
Agpada da Senator Tulfo ken Senator Pia Cayetano a nangipeksa iti panggepda nga idauloan ti Senate Blue Ribbon Committee.
Maipalagip a siguden nga indauloan ni Senator Cayetano ti nasao a komite sipud January 2024 agingga June 2025 kabayatan ti 19th Congress.
Kabayatanna, immuna metten a saan nga inawat dagiti Senador a da Francis “Kiko” Pangilinan, JV Ejercito, ken Raffy Tulfo ti nasao a chairmanship.
Awan pay met ti naipaay a komento nu interesado ni Senator Risa Hontiveros nga agbalin a Senate Blue Ribbon Committee chairperson gapu ta maysa metlaeng daytoy nga innaganan ti Senate President kadagiti pagpilyan para iti nasao a posisyon.
