Nangipaay iti clue da Senador Joel Villanueva ken Jinggoy Estrada maipapan iti kinasiasino ti indibidual a nangtulong kenni dismissed Bamban, Tarlac Mayor Alice Guo tapno makalibas iti Pilipinas.
Sigun kenni Villanueva, daytoy nga indibidual ket addaan iti Chinese name bayat a kinuna met ni Estrada a daytoy ket Chinese national a mapapati a boss ti Philippine Offshore Gaming Operators ngem maatap a nakapanawen iti pagilian ken adda itan idiay Taiwan.
Idi nasaludsod ni Estrada nu ti dakdakamatenna ket ti managan iti Huang Zhiyang ket saanna a siento porsiento a kinumpirmar.
Bayat ti Senate hearing itay agsapa, inaklon ni Guo a nakapanawda iti pagilian babaen iti boat transfer.
Idi un-una, nagkedked ni Guo nga ibaga ti nagan ti indibidual a nangtulong kenkuana tapno makalibas agingga a napilitan daytoy a mangisurat iti papel.
