BAGUIO CITY – Naipasidong iti surprise drug testing ti amin a personnel ti BJMP Male Dormitory ken sumagmamano a persons deprived of liberty (PDL) idi Huebes May 21, 2026.
Daytoy ket paset iti quarterly nga aktibidad iti nasao nga ahensia tapno masiguro ti kinatalged ken agtalinaed a drug-free ti nasao nga ahensia.
Sigun kenni JSINP Rolando Diwas, Chief Administrative Section iti BJMP male Dorm, ti drug test a maipatpatungpal ket maysa nga addang tapnu maipakita iti publiko a drug-free ti pasilidad.
Kinunana pay a kagiddan iti surprise drug testing ket naipatungpal metlaeng ti greyhound kadagiti selda wenno pagbaludan.
Inlawlawag ni Diwas a ti dua a nasao nga aktibidad ket direktiba iti ngatuen dagitoy tapno awan ti aniaman nga iligal a kontrabando a maiserrek.
Kinunana nga amin a sumrek iti pasilidad ket masukimat kasta metlaeng kadagiti personnel. Imbinglayna pay nga idi napalabas a tawen ket naipaayan dagitoy iti certificate kas Drug-Free Facility.
Impanamnamana met iti publiko a tulunganda nga agbaliw dagiti pamilia a naibalud, ken impakaamona nga adu dagiti aktibidad a maipatpatungpal.
Iti agdama, makapaspasar paylaeng ti congestion ti BJMP Male Facility ngem saan a kasla kadagiti kasasaad idi napalabas a tawen.
Namnamaen pay ti nasao nga opisial ti dagos a pannakaileppas ti BJMP New Facility idiay Barangay San Luis ken marisut dagiti agdama a pakasekna a sangsangwen dagitoy.| Bombo Noveh Organo
