--Ads--
Impakaammo ni Bontoc Mayor Jerome Tudlong, Jr. ita nga aldaw a nakaawat daytoy iti update manipud kadagiti otoridad a nabigbigdan ti persons of interest iti ipupusay ti 22-anyos a criminology student manipud Mt. Province.
Nupay kasta, saanda pay a dinakamat ti kinasiasino daytoy.
Maipalagip a pimmusay ni Jeffgart Dongpopen idi Abril 8 gapu iti nakaro a dunor iti utakna a nasagrapna manipud iti nakairamananna a gulo idi rabii ti Abril 5.
Impasigurado met ni Mayor Tudlong nga aramiden dagiti otoridad ti kabaelanda tapno maipaayan iti hustisya ti ipupusay ni Dongpopen.
Impeksana pay ti pannakipagladingetna iti maseknan a pamilya ken kadagiti umili ti Talubin ken Caneo a nakaro a naapektaran iti napasamak nga insidente.
