Agtultuloy nga agwarwaras ti sakit a pertussis wenno whooping cough iti pagilian iti uray anya nga edad.
No pay kasta, mas napegpeggad daytoy kadagiti maladaga.
Iti panakiuman ti Bombo Radyo kenni Miguel Vargas, Board of Director ti Philippine Nurses Association-La Union Chapter, kangrunaan a simtomas ti pertussis ket ti panag-uyok a mabalin a bumayag ti dua a lawas.
Ti nasao a sakit ket mabalin met a mangitunda iti panakadadael ti bara ti maysa nga indibidual, ti panakaadda ti komplikasyon ken mabalin met daytoy nga agbalin a rason para iti ipupusay ti maysa a tao no saan a maagasan a dagus.
Gapu iti dayta, nagballaag ni Vargas kadagiti nagannak a saanda nga iruruar dagiti annakda nangruna no saan pay dagitoy a nabakunaan ken rumbeng a kompletuenda ti umuna agingga maikatallo a doses wenno ti 2 months, 4 months ken 6 months a panagbakuna kadagiti ubbing.
Kabayatanna, kinuna ni Vargas a mabalin maliklikan ti sakit a pertussis babaen ti panagpabakuna, kanayon a panag-ugas ti ima ken panagusar ti facemask.//Marielle Apat
