Impakaammo ti Office of the Ombudsman a naipasidungen iti validation dagiti naawatda a report manipud senado seknan iti naanomalyaan a flood control projects iti pagilian.
Maipalagip a kinumpirmar ti Tanodbayan ita a lawas a naawat dagitoy ti nasao a report nga immunan nga innaramid ti Senate Blue Ribbon Committee kalpasan dagiti serye ti panagdengngeg a napasamak.
Sigun kenni Ombudsman Crispin Remulla, makarulong ti senate report tapno adadda a mapalawa ti imbestigasyon seknan kadagiti immunan a naibutbutaktak, pakairamanan ti agtultuloy a panangipila ti kaso kontra kadagiti adda pakainaiganna iti nasao a kaso.
Innayon pay daytoy a maaramat ti nasao a report tapno mapapigsa ti agtultuloy a fact-finding investigation ti Tanodbayan.
Iti agdama, sumagmamanon a kaso agingga Setyembre iti napalabas a tawen ti mapilaanen ti kaso manipud kadagiti adda pakainaiganna iti flood control projects agingga kadagiti indibidual a nakitaan iti conflict of interest.
Sakbay dayta, isagsagana metlaengen ti Ombudsman ti maikadua a draft complaints kontra kadagiti sumagmamano nga indibidual a maatap a konektado iti “Conspiracy to commit plunder”.
Nupay kasta, saan paylaeng dagitoy nga innagagan ti nasao nga opisyal. //bombokaren.c.s
