BAGUIO CITY – Mairikrikos ita ti maysa a petisyon kadagiti agnanaed iti asideg ti Dairy Farm partikular iti napagbalin nga staging area dagiti basura ti siudad ti Baguio para iti panagpirma dagitoy.
Kinuna dagiti maseknan a residente a ti panagpetisyon ti kakaisuna nga addang nga aramidenda kontra iti nasao nga staging area gaputa awan ti nangay a public consultation sakbay a naaramat ti nasao a disso.
Nakipatang met ti Tuba Municipal Environment and Natural Resources Office iti Environmental Management Bureau – Cordillera mainaig iti imbestigasyon nga ipatungpal dagitoy.
Immunan a kinuna ni EMB-Cordillera regional director Reynaldo Digamo nga imbestigaranda no adda ti panaglabsing ti hauler dagiti basura ti siudad iti panagaramatda iti paset ti Dairy Farm kas temporaryo nga staging area dagiti basura a makolkolektarda iti siudad ti Baguio.
Kinunana a kitaenda met laeng no makaapektar kadagiti umili sadiay Poblacion, Tuba, Benguet ti panakaaramat ti nasao a lugar.
Naamuan nga awan pay ti naipaay a Certificate of Non-Coverage para iti pannakaramat ti Dairy Farm kas staging area dagiti basura ti Baguio City.
Naipanamnama met ti nainget a panangmonitor ti lokal a gobyerno ti Tuba iti nasao a disso nangruna ta agtultuloy ti maaw-awat dagitoy a reklamo.
