BAGUIO CITY – Isagsagana ti grupo dagiti sumagmamano nga Indigenous Peoples (IPs) iti siudad ti Baguio ti maysa a petisyon a mangkwestionar iti maysa a probisyon ti Indigenous People’s Rights Act of 1997 wenno IPRA.
Iti panakiyuman ti Bombo Radyo kenni Atty. Jingboy Atonen, kinunana a posible a maipila ita a lawas ti nasao a petisyon a direkta a mangkwestionar iti presensia ti Indigenous Peoples Mandatory Representative (IPMR) iti lokal a konseho.
Sigun kenkuana, amin a miembro iti lokal a konseho ket IPs ken ti siudad ket ‘melting po’ dagiti nagduduma a tribu.
Partikular a kayatda nga ipalawag ti korte no ti Baguio City wenno dagiti IPs iti siudad ti Baguio ket ‘entitled’ wenno kwalipikadoda a maipaayan ti IPMR.
Inyunay-unayna a ti intensiyon iti panakaipaay ti IPMR iti partikular a lokal a gobyerno ket no dagiti IPs iti nasao a lugar ket ‘marginalized’ wenno agkasapulan ti panangibagi iti lokal a konseho.
Impettengna a no met dagiti IPs ti majority wenno kaaduan iti maysa a lugar ket saanen nga epektibo ti nasao a probisyon ti IPRA.
Innayonna a babaen iti petisyon ket malawlawagan ken maipalawag ti korte ti nasao a pakaseknan dagiti IPs ditoy lokalidad.
