BAGUIO CITY – Tubtubngaren ti Baguio City Police Office (BCPO) ti kaudian a petisyon dagiti bar owners ditoy siudad a panakailaylayon ti operasyonda iti agingga alas sais ti agsapa.
Iti panakipatang ti Bombo Radyo kenni BCPO City Director PSSupt. Ramil Saculles, kinunana a nangisumitir manen iti sabali petisyon sadiay City Council ken Mayor’s Office dagiti agnegnegosyo iti balay paginuman para iti panggep dagitoy a panakailaylayon ti operasyonda agingga iti agsapa.
Impettengna nga umdasen ti naipaay a winding up wenno pawayway iti operasyon dagiti balay paginuman agingga iti alas tres ti parbangon para kadagiti bars a naituding nga agrikep iti alas dos ti parbangon.
Kagiddan iti daytoy, inyunay-unayna a nainget latta ti panangipatungpal dagiti amin nga istasyon ti pulisia iti curfew kadagiti bambantayan dagitoy a balay paginuman agingga a saan a maamyendaran ti orihinal a Liquor Ordinance of Baguio a mangsaksakop iti operasyon dagiti balay paginuman.
