Nainget a bambantayan ti Philippine Consulate General idiay Los Angeles ti nalawa nga operasion nga isaysayangkat dagiti nagduduma nga ahensia ti Estados Unidos babaen ti panangidaulo ti Immigration and Customs Enforcement (ICE) kontra kadagiti maibilbilang nga “undesirable” ken “illegal immigrants” iti nagduduma a paset ti California.
Sigun kenni Consul General Adelio Angelito Cruz, manarimaan ti panagberipikar ti konsulado iti damag nga adda ti maysa a Pilipino a karaman kadagiti sumagmamano a nakemmeg iti nasaisayangkat nga operasion dagiti otoridad.
Iti umuna a damag manipod iti US federal immigration authorities, maysa a Pilipino nga agtawen ti 55 manipod Ontario, California ti adda iti kostodiya dagiti otoridad.
Mapapati nga adda ti pending notice ti Pilipino tapno agparang iti immigration court.
Mapapati a sigud a nasentensiaan ti Pilipino a maibalud iti uppat a tawen iti kasona a panagtakaw.
Malaksid iti dayta, mapapati a nasentensiaan pay ti Pilipino iti tallo pulo ket pito a tawen para met iti kasona a “sexual penetration with a foreign object by force” ken “assault with intent to commit rape” a napasamak idiay Pomona.
Nangrugi ti ICE operation idi Biernes a gapuanan ti panagprotesta idiay Los Angeles.
Inakusaran dagiti advocacy group ken immigration rights supporters a nakaro ken naabuso ti maisaysayangkat nga operasion.
Gapu iti panagprotesta, imbilin ni US President Donald Trump ti panangideploy iti nasurok 2,000 a National Guard tapno suportaran dagiti federal agent iti nagduduma a lugar idiay California, nangruna idiay Los Angeles.
Impasigurado ti Philippine Consulate a nakasaganada a tumulong kadagiti Pilipino a naapektaran iti maisaysayngkat nga operasion ti ICE.
