Manarimaan ti koordinasyon ti Department of Foreign Affairs kadagiti otoridad sadiay Hainan, China para iti panakaipaay ti abogado kadagiti tallo a Pilipino a nadetain sadiay gapu iti maatap a panag-espiyada.
Sigun kenni Department of Foreign Affairs Undersecretary for Migrant Affairs a ni Eduardo de Vega, addan ti naalada nga abogado no sadino kidkiddawen ti pagilian kadagiti otoridad sadiay China ti panagbisita dagitoy kadagiti nakadetain a Pilipino.
Immunan met nga inyebkas ti National Security Council ti panaka-alarmada kasta met ti “confession” nga inaramid dagiti tallo a Pilipino a sigud a recipient ti Hainan Government Scholarship program.
Maipalagip nga idi napalabas ket naipakita ti footage ti tallo a Pilipino a kukwestionaran dagiti otoridad sadiay China a naipabuya iti maysa nga state television.
Nupay kasta, kinuna ni National Security Council Assistant Director General Jonathan Malaya a kasla scripted ti napasamak.
Kabayatanna, inyuna-unay ti Department of Foreign Affairs a nasken a matrato dagiti Pilipino iti due process kas maibasar iti domestic law ken iti Philippine-China Consular Agreement.
