Nagturong dagiti kameng iti Philippine contingent idiay Myanmar ita nga aldaw tapno mangipaay iti humanitarian assistance kadagiti lugar iti nasao a pagiian a naapektaran iti napigsa a gingined idi Biernes.
Sakbay ti departure dagitoy ket naangay ti send-off ceremony nga indauloan da Department of Health Secretary Teodoro Herbosa, kadwa da Undersecretary Ariel F. Nepomuceno, Civil Defense Administrator (OCD), ken Lieutenant General Arthur M. Cordura PAF, Commanding General iti Philippine Air Force.
Ti Philippine contingent ket buklen iti 91 nga indibidwal nga idadauloan ni Lieutenant Colonel LtCol Erwen S. Diploma PAF, kadwa ti Urban Search and Rescue Teams manipod iti Philippine Army, Philippine Air Force, Bureau of Fire Protection, Metropolitan Manila Development Authority, iti Department of Environment and Natural Resources/Private Sector (EDC and APEX Mining), Philippine Medical Assistance Team manipod iti Department of Health, ken dagiti coordinators manipod iti Office of Civil Defense.
Dua nga C-130 ti nangitulod iti immuna a 58 a contingent members para iti dua a lawas a deployment dagitoy idiay Myanmar bayat a dagiti 33 a miembro ket naituding a maitulod inton bigat babaen iti maysa metlaeng a C-130 aircraft.
Karaman kadagiti karga dagiti personnel ti search and rescue equipment ken medical supplies para iti panagipatungpalda iti life-saving operations, panangipaayda iti medical assistance, ken critical aid iti nasao a misyon.
Daytoy nga operasyon ket mangipakita iti dedikasyon iti gobyerno iti Pilipinas iti panangipaay iti humanitarian assistance ken ti komitment daytoy iti napartak a disaster response kasta metten ti regional cooperation.
