Agtultuloy latta ti panagmonitor ken pannakikoordinar ti Philippine Embassy idiay Nairobi, Kenya kadagiti Overseas Filipino Workers (OFW) sadiay kalpasan ti napasamak a panaglayos ken panagreggaay idi laeng kalman.
Maipalagip a pimmusay ti agarup uppat a pullo ket lima nga indibidual bayat a nadangran dagiti agarup sangagasut sangapulo kalpasan paylaeng iti napasamak a panagreggay ken panaglayos iti nasao a lugar.
Iti pannakiuman ti Bombo Radyo kenni Vice Consul Louie Dane Merced manipud iti Philippine Embassy idiay Nairobi, Kenya, kinuna nga awan paylaeng ti nagtawag wenno naireport a naapektaran a Pilipino iti napasamak a panaglayos.
Sigun kenkuana, adda met iti nasayaat a kasasaad dagiti Pilipino missionaries sadiay.
Iti agdama, nakasagana ti nasao nga embahada a tumulong kadagiti Pilipino apaman nga adda maireport a naapektaran iti daytoy.
