BAGUIO CITY — Naingeten ti panagasana ti Philippine Military Academy (PMA) para iti panagturpos ti PMA Alab Tala Class 2018.
Iti pannakipatang ti Bombo Radyo-Baguio ken ni Lt. Col. Reynaldo Balido Jr., public information officer ti akademia, kinunana a Marso 18 ti tentative a petsa ti PMA graduation.
Nupay kasta, kinunana a posible a mabaliwan ti nasao a petsa depende iti schedule ni Presidente Rodrigo Duterte nga agserbi kas guest of honor and speaker iti aktibidad.
Dinakamatna nga iti agdama ket manarimaan ti rehearsal dagiti kadete para iti awarding of honors, academic parade ken ti parada para iti pannakapasangbay ti Presidente.
Malaksid iti dayta, kinuna ni Col. Balido a maisagsagana metten dagiti pasilidad ti akademia para iti PMA graduation.
Innayonna a mangrugi inton Marso 12 agingga inton Marso 18 ket temporario a maiparikep ti akademia kadagiti turista tapno maakomodar ken maasikaso dagiti nagannak dagiti agturpos.
Kabayatanna, maiparang iti publiko ken iti sanguanan dagiti kameng ti media ti Top 10 ti Philippine Military Academy (PMA) Alab Tala’ Class 2018 inton Marso 14.
Iti baet daytoy, saan pay a dinakamat ti opisial ti pakabigbigan dagiti kadete a mangbukbukel iti Top 10 ti PMA Alab Tala’ Class 2018.
Mainaig iti daytoy ket kinuna ni Balido a dumanon iti 285 ti bilang dagiti kadete nga agturpos ita a bulan a pakairamanan ti 210 a lallaki ken 75 a babbai.
Namnamaen ni Balido a makaturpos amin dagiti nasao a kadete babaen iti agtultuloy a panagbalin dagitoy a natulnog kadagiti pagalagadan ti akademia agingga a madanon ti aldaw ti panagturpos dagitoy.
