Inlawlawag ni Atty. Fidel Santos, maysa kadagiti Peoples’ Lawyer manipud Nueva Viscaya ti maipapan iti Philippine Mining Act of 1995 kasta metten iti IPRA Law.
Iti pannakiuman ti Bombo Radyo kenkuana, inlawlawagna a ti Philippine Mining Act ti linteg a mangipapaay iti pammalubos kadagiti mining companies pakairamanan dagiti daddakel a kompanya nga agminas iti pagilian a Pilipinas.
Iti sidung ti nasao a linteg, naipaima iti Department of Environment and Natural Resources (DENR) babaen iti Mines and Geosciences Bureu (MGB) ti panagpalubos iti maysa nga aplikasyon nga isumitir ti maysa a mining company a kayatna a mangipatungpal iti mining exploration iti maysa a lugar.
Nupay kasta, impeksana nga addu dagiti kasapulan a requirements tapno mapalubosan nga agmina ti maysa a kompanya. Karamanen ditoy ti clearance manipud iti DENR, konsultasyon kadagiti umili iti maapektaran a lugar wenno ti social acceptability, ken pammalubos dagiti umili a mangiyuswatda iti exploration iti nasao a lugar.
Impeksa ni Atty. Santos a sakbay a maisayangkat ti exploration, rumbeng nga adda dagiti pudno a konsultasyon ken pammalubos dagiti umili iti maapektaran a lugar.
Impaganetget pay ti nasao nga abogado nga iti sidung ti Philippine Mining Act kasta metten iti IPRA Law, saan a mabalin a maipaay ti exploration permit ti mining applicant agingga saan daytoy a nangisaysayangkat ti Free Prior Informed Consent (FPIC) no sadino kasapulan ngamin a mangi-issue nga umuna ti NCIP a mangibagbaga nga immanugot dagiti umili a maipatungpal ti nasao nga exploration iti lugarda.
Nupay kasta, impeksana a depende daytoy nu ti mapagsarsaritaan a pasdek ket sakupen ti Certificate of Ancestral Domain Title (CADT).
