Agsagsagana ti Pilipinas para iti posible nga idadar-ay dagiti dadaulo iti Estados Unidos, Russia, Japan, ken China iti ASEAN Leaders’ Summit ken ASEAN-Plus meetings.
Ti Pilipinas nga isu ti Chair iti Association of Southeast Asian Nations (ASEAN) ita a tawen ket manamnama a mangsangaili iti 48th ASEAN Leaders’ Summit and Related Summits inton May 8 agingga May 9 idiay Cebu a sarunwen iti 49th ASEAN Summit and Related Summits inton November 10 agingga November 12 iti Philippine International Convention Center (PICC) idiay Pasay City.
Iti baet nga awan pay ti pormal a kumpirmasyon manipod kenni United States President Donald Trump, Chinese President Xi Jinping, wenno kenni Japanese Prime Minister Sanae Takaichi, amin a posibilidad ket pagsagsaganaan ti Pilipinas kas host iti summit.
Ti ASEAN Summit ket maysa nga aktibidad a tinawen a maipatpatungpal maitunos ti ASEAN Charter.
Dardar-ayan daytoy dagiti dadaulo iti eleven member states iti ASEAN a kas iti Brunei, Cambodia, Indonesia, Laos, Malaysia, Myanmar, Singapore, Thailand,Vietnam, pakairamanan ti Pilipinas ken ti kaudian a kimmappeng a Timor-Leste.
Maipalagip nga idi napan a tawen ket sinangaili ti Malaysia ti maika-47 nga ASEAN Summit ken ita a tawen ket sublaten met ti Pilipinas.
