Agtaltalinaed a kapeggadan ti pagilian a Pilipinas iti Asya para iti environmental activists.
Maibasar iti datus ti international watchdog, naduktalan a 298 manipud iti 468 nga environmental defenders ket napapatay iti Pilipinas manipud tawen 2012 agingga 2023 a katupag ti 64% death toll.
Idi napan a tawen, sangapulo ket pito nga indibidual ti napapatay iti pagilian bayat ti panangdependar iti komunidad da kontra kadagiti corporate ken environmental harm.
Iti sangalubongan, maikatlo ti rangko ti Pilipinas iti bilang dagiti napapatay nga environmental activists manipud 2012 agingga 2023, simmaruno iti Colombia ken Brazil.
Malaksid iti dayta, mapagam-amkan metlaeng ti bilang dagiti abduction ken legal harassment iti Southeast Asia a nairanta a mangpaulimek iti panagsusupiat.
Karamanen ditoy ti kaso da environmental defenders Jhed Tamano ken Jonila Castro a nakawtibo bayat ti panagtrabahoda kadwa da dagiti mangngalap a naapektaran ti land reclamation projects idiay Manila Bay idi Setyembre iti napan a tawen.
Maibasar pay iti nasao a report, agtultuloy ti panagbutbuteng ken red-tagging kadagiti environmental activists iti sidong ti agdama nga administrasyon.
