Naaddaan ti produktibo a saritaan ti Pilipinas ken Vietnam mainaig iti komprehensibo nga estratehiya a panagtinnulong, sigun kenni President Ferdinand “Bongbong” Marcos Jr.
Ngem sakbay daytoy, kinuna ni Foreign Affairs Secretary Enrique Manalo nga ad-adalen ti Pilipinas ti panangital-o ti strategic partnership daytoy iti Vietnam.
Iti maysa a bilateral meeting iti nagbaetan ni President Marcos ken Vietnamese Prime Minister Pham Minh Chinh, impasigurado ti dua ti “commitment” ti tunggal maysa para iti panagdur-as ti dua a pagilian nangruna iti diplomatic relations.
Panggepda pay a papigsaen ti panagtitinnulong iti agrikultura ken seguridad ti taraon ken mapasayaat ti panagsinnukat dagiti tattao iti edukasion, turismo, ken pannakipaset iti kultura.
Kabayatan ti panagtaripnong, inyebkas pay ni President Marcos ti panakipagladangitna iti Presidente ti Vietnam iti ipupusay ni sigud a Vietnamese President Tran Duc Luong idi Mayo 20, 2025.
