Dimmanon iti wallo pulo ket uppat ti pimmusay iti pagilian a Pilipinas gapu iti rabies, manipud Enero agingga Marso diese sais iti agdama a tawen, sigun iti Department of Health.
Gapu iti dayta, makidkiddaw kadagiti addaan ti taraken a siguraduenda a tinawen a mabakunaan dagiti pusa ken asoda, babaen kadagiti lisensiado a beterinaryo.
Sigun iti veterinarian a ni Dr. Marie Shella Ordinario, immadu ti insidente ti panagkagat ti aso bayat ti nabara ken dry season.
Nupay kasta, inlawlawag ni Ordinario a saan a direkta a mainaig iti kinabara ti paniempo ti aggression dagiti ayup.
Innayun ti nasao a doktor nga ugasan ti sugat ti running water ken sabon iti sangapulo agingga sangapulo ket lima a minuto, tapno maugasan dagiti virus ken dagus nga agturong iti kaasitgan nga animal bite treatment centers a mangipaay ti libre a bakuna a manglapped iti rabies.
Kabayatanna, nagpakdaar ti Department of Health ti saan a panagsida iti karne manipud kadagiti pimmusay nga ayup, gapu iti posible a saan a nasayaat nga epekto daytoy iti salun-at.
