Dumanunen iti 76 ti bilang dagiti kompirmado a pimmusay iti nauram nga MV June Aster idi Meirkules, September 9, 2026.
Daytoy ket kalpasan a narekober ti 41 a kanayunan a bangkay manipud iti nasao a barko.
Malaksid kadagiti bangkay ti tattao, nasarakan metlaeng ti sumagmamano nga aso a nauram.
Sigun kenni PCG spokesperson Commodore Noemie Cayabyab, mailugan iti BRP Cape Engaño (MRRV-4411) dagiti 41 a bangkay intun Domingo, September 13.
Iti agdama, agtultuloy paylaeng ti recovery operations kadagiti dadduma a pasahero.
Maibasar iti ticket manifest ti 134 nga indibidual, 13 ti saan a naibilang bayat a dua ti naipadamag a saan a naglugan iti barko.
Sigun iti PCG, posible nga agbaliw ti bilang bayat nga agtultuloy ti recovery ken identification operations.
Agtaltalinaed a 43 paylaeng ti bilang dagiti nakalasat.
Maipalagip a nauram ti MV June Aster kabayatan ti panagdalyasat daytoy iti baybay a paset ti Coron, Palawan.
Agtultuloy paylaeng ti imbestigasyon dagiti otoridad iti rason ti napasamak nga insidente.
