BAGUIO CITY – Binigbig ken dinayaw ni PNP chief Ronald “Bato” dela Rosa ti panagbalin a napudno iti trabaho dagiti pulis iti probinsya.
Segun iti PNP chief, napudno iti trabaho dagiti pulis iti probinsya nu idillig kadagiti pulis a naisarang kadagiti naanomalyaan nga aramid.
Kinunana met a sinsero ti PNP iti panangdalusda iti organisasyon dagitoy nangruna dagiti maaw-awagan a pulis scalawags.
Linawlawaganna met nga awan kadagiti pulis sadiay Kalinga ti naipatulod sadiay Basilan.
Immapela met daytoy iti publiko a suportaranda ti kampanya ti nasyunal a gobyerno kontra iti iligal a droga ken korapsyon.
Adda ita sadiay Kalinga ni PNP chief dela Rosa ken sinarunglaranna dagiti nadangran ken ti pamilya dagiti pimmusay a pulis iti napasamak nga engkwentro sadiay Lubuagan, Kalinga.
Indanonna met ti mensahe ni Pres. Rodrigo Duterte a nalidayan iti nagbanagan dagiti pulis a mangiserbi kuma iti arrest warrant kontra iti maysa a top most wanted personality iti national level.
