BAGUIO CITY- Inruaren ti Cordillera Regional Disaster Risk Reduction and Management Council (CRDRRMC) babaen iti Office of the Civil Defense – Cordillera ti pinal a report seknan iti nagbalin nga epekto ti habagat ken bagyo a Domeng iti rehion Cordillera.
Nailanad iti report a pakabuklan a dua nga indibidual ti pimmusay bayat a dua met ti nadangan gapu iti panakagabur dagitoy iti nagsina nga insidente ditoy siudad ti Baguio.
Naibakwit met ti 11 a pamilya a bukbuklen ti 46 nga indibidual iti Baguio ken Benguet, no sadino, 9 a pamilya ti nagbakwit ditoy siudad bayat a saggaysa a pamilya sadiay Bakun ken Kapangan iti Benguet.
Naan-anay a nadadael ti dua a balay ditoy siudad ti Baguio bayat a tallo ti nadadael bassit ken ti dua ditoy ket sadiay Bakun ken Kapangan iti Benguet.
Pakabuklan pay a walo a panagreggaay ti daga ti nailista ti ahensia, maysa ti natumba a kayo ken dua ti nargaay a kabiti.
Iti agdama, naka-alerto manen ti CRDDRMC para iti aniaman nga epekto ti agtultuloy a panagtudona ditoy rehion Cordillera, kagiddan ti panakapasar iti epekto ti bagyo nga Ester a mangpakpakaro iti habagat.
