BAGUIO CITY – Inaklon ti maysa a Pinay nurse sadiay Germany a nakapadas daytoy ken dagiti padana a nurse iti anxiety wenno nakaro a panagdanag idi karugrugi ti parikot iti COVID-19 sadiay.
Sigun kenni Bombo International Correspondent Maria Karen Viola, maysa a nurse sadiay Germany, daytoy ket gapu ta saan a dagus a naaksionan ti pagkasapulan dagiti medical frontliners sadiay.
Dinakamatna a saan idi nga istrikto ti Germany iti panagaramat kadagiti personal protective equipment.
Innayonna nga idi karugrugi ti parikot ket saan nga agar-aramat dagiti tattao sadiay iti face mask ken rumrumuarda latta kadagiti babbalayda.
Nupay kasta, kinunana a nakaadal iti leksion ti Germany ken ita ket sumaysayaaten ti kasasaaad dagiti medical frontliners gapu ta maipapaayen ti tulong a kasapulanda.
Kabayatanna, kinunana pay nga adda dagiti Pinoy sadiay pakairaman dagiti frontliners a nakaptan iti COVID 19 ken ti dadduma kadagitoy ket agim-imbagen.
Sigun pay kenni Viola, agtitinnulong dagiti Pinoy sadiay Germany, saan laeng nga iti pinansial no di ket kasta metten iti emosional.
