Sinilawanen ti Philippine Consulate General idiay New York City ti 6-feet a Christmas lantern nga agar-aramat ti light-emitting diode (LED), a maimatangan iti sango ti konsulado.
Ti namaris a light-emitting diode (LED) lantern ket maimatangan dagiti lumabas iti 5th Avenue ti Manhattan, nalatak a destinasion ken sarungkaran ti minilion a turista manipud iti nadumaduma a pagilian bayat ti panawen ti bakasion.
Ti tinawen a panagsilaw ti parol kas paset ti selebrasion ti piesta iti nasao a lugar ket mapadpadaanan ken nagbalinen a tradision ti konsulado.
Malaksid idi dayta, maysa a nagdakkel nga LED screen ti adda iti ruar ti konsulado a mangipakpakita ti napintas a destinasion ti Pilipinas.
Suporta daytoy iti kampanya ti Department of Tourism a “Love the Philippines” nga addaan panggep a maguyguygoy dagiti amin a ganganaet a bumisita iti Pilipinas.
Intampok ni Tourism Attaché Francisco Lardizabal ti panangipamaysa ti kampania kadagiti agbibiahe iti Gen Z ken kinunana:
“Our main goal is to make this appealing to Gen Z, which is why the design was tailored for them. Secondly, of course, we are doing this to promote our current campaign, ‘Love the Philippines.’ That’s why on the right side, we highlight travel, and on the left, we showcase the parol…”
Tourism Attaché Francisco Lardizabal
Daytoy a gannuat ket mangipakpakita ti nabiag ken namaris a panagtipon ti kultura dagiti Pilipino ken ti pannakaitandudo ti turismo, a mangawis kadagiti ganggannaet a mangsukimat iti kinapintas ti Pilipinas.
