BAGUIO CITY-Umap-apela ti Filipino Inventor Society (FIS)-Cordillera Chapter iti tulong ti gobierno para commercialization ken promotion kadagiti produkto dagitoy.
Sigun ken ni Villamor Casiquin, presidente ti FIS-Cordillera Chapter, adu dagiti naidumduma nga imbension dagiti imbentor a Pilipino ngem saan dagitoy a mapagnumnumaran ti komunidad gapu iti kinakurang ti suporta ti gobierno.
Kinunana a saan nga umdas dagiti pasalip nga ipatpatungpal ti Department of Science and Technology kadagiti nagduduma nga imbension dagitoy.
Kinunana a kalpasan dagiti pasalip a paspasetan dagiti imbentor ken awanen ti tulong nga ipapaay kadakuada ti gobierno ken mangamong manen dagitoy a mangi-promote kadagiti imbensionda.
Dinakamatna pay a saanda a mapagnumnumaran ti tax exemptions kadagiti imbentor gapu ta saanda met a malaklako dagiti imbension dagitoy gapu iti kinakurang ti commercialization.
Inlawlawagna nga apaman nga suportaran ti gobierno ti ad-adu a produksion dagiti imbension dagitoy ken saan laeng a dagiti Pilipino inventor ti agnumar no di ket kasta metten ti komunidad gapu ta mangitunda daytoy iti ad-adu a trabaho.
Ni Casiquin ti 2nd finalist iti Kahapon Lamang Light at the End of a Tunnel a programa ti Bombo Radyo.
Kabayatanna, binalakadan ni Casiquin dagiti umili a saan dagitoy a sumuko kadagiti karit ti biag.
Kinunana a dagiti pannubok ti nasken nga aramaten dagiti umili a karit tapno makalung-aw dagitoy manipud kadagiti narigat a kasasaad.
Inyestoriana dagiti napasaranna a nagduduma a rigat manipud iti nakaro a pannakababaotna idi ubing daytoy, agingga a nagsursuro iti stenography ken nagbalin a tagabo sadiay Metro Manila gapu ta saan daytoy a nakabaddek iti kolehio.
Kinunana nga idi naipaayan daytoy iti gundaway nga agtrabaho iti opisina ti piskalia sadiay Zambalez ket nalalais daytoy gapu ta nakadkadlaw iti langa ti kinapanglaw ti nagtaudanna a pamilia.
Kinunana a naberngasan pay daytoy kas “Always” gapu ta agpapada ti bado nga isusuotna iti trabaho.
Kinunana a kalpasan a nangged daytoy sadiay Saudia Arabia ket nangipasdek iti bag shop a nangipuonanna kadagiti urnongna.
Nupay kasta, napuoran ti bag shop daytoy a rason tapno mapukawan daytoy iti limbong ti panunot iti las-ud ti makatawen.
Iti baet dagita, saan a napukawan iti namnama ni Casiquin ken ita ket maysan daytoy a successful nga imbentor a makaar-aramid iti nagduduma a produkto kas iti ng Cratage, Friendly Rat Killier, Bill-Box, Nature’s Ioln, NaAREE water bottle, LabSa formula ken dadduma pay.
