Mangisayangkat ti Pinagkaisang Samahan ng mga Tsuper at Operators Nationwide (PISTON)-Cordillera iti tignay-protesta iti Baguio City ita nga aldaw.
Maangay dagiti ababa a programa iti dua a lokasyon parikular idiay Carantes a mangrugi iti 1:30 ita a malem bayat a 2:00PM met a maisayangkat daytoy iti Igorot Park.
Iti panakiuman ti Bombo Radyo kenni PISTON-Cordillera spokesperson Mike Cabangon, panggep ti aktibidad nga iduron ti gobyerno a mangaramid iti kongkreto ken naan-anay nga aksyon tapno marisut ti agdama a parikut iti sektor ti transportasyon parikular ti nangina a balor ti produko a petrolyo.
Karaman kadagiti nabayagen nga ipukpukkawda ken ulitenda ita nga idagadag ti panakawaswas ti Oil Deregulation Law (RA 8479) kasta metten ti maipatpataw a 12% VAT ken ti excise tax.
Maipalagip nga iti bileg ti Oil Deregulation Law ket naikkat ti turay ti Energy Regulatory Board a mangituding kadagiti presyo ti lana nu sadino,nagbalin a ti suplay ken demand ti pakaibarasan ti presyo dagitoy.
Patien ni Cabangon a nu maaksyunan dagitoy ket makaipaay iti dakkel a bang-ar iti sektor ti transportastyon ken kadagiti mangmangged.
Kabayatanna, kinuna ni Cabangon nga iti baet a makatulong dagiti financial aid ken subsidiya a maipapaay kadagiti driver,kinunana a saan nga umdas daytoy nangruna ket saan a sigurado nu kaano nga agsardeng ti gubat idiay Middle East a maysa a gapuanan tatta ti nakaro a panagngato iti presyo dagiti produkto a petrolyo.
Iti baet dayta,pinagyamanan ti opisyal ti lokal a gobyero ti Baguio City gapu iti panakaipaay ti sag-limaribo a piso a tulong pinansyal kadagiti nasurok sangaribo a driver iti Baguio City.//Bombo Rob Dominguez
