BAGUIO CITY – Pursigido nga ag-petision dagiti residente dagiti babbarangay a maapektaran iti panggep ti lokal a gobierno ti siudad a pannakaipasdek ti Sewerage Treatment Plant (STP) sadiay Lower Rock Quarry, Baguio City.
Iti interbyu ti Bombo Radyo ken ni Lower Rock Quarry Punong Barangay Benigno Marzan, malaksid kadagiti residente iti barangayda ket makikaykaysa iti petision dagiti maapektaran a residente ti Middle Rock Quarry, Lower Lourdes ken Lourdes Extension.
Dinakamatna a maibasar iti plano ket dumanonen iti 1.1 hectares ti kalawa ti lugar a maapektaran ken kadakkelan a paset daytoy ket sakup ti Lower Rock Quarry.
Impettengna a saan dagitoy a kontra iti panggep a pannakaipasdek ti baro nga STP ti siudad.
Nupay kasta, kinuna ni Marzan a tubtubngarenda ti negatibo nga epekto daytoy kadagiti residente.
Dinakamatna a no matuloy ti plano ket maapektaran ti 21 a babbalay sadiay Lower Rock Quarry ken sabali pay dagiti maapektaran sadiay Middle Rock Quarry, Lower Lourdes ken Lourdes Extension.
Sigun kenkuana, panggep ti lokal a gobierno ti mangipaay iti sag 45 square meters a lote kagiti maapektaran a residente.
Nupay kasta, impetteng ti kapitan a saan daytoy nga umdas nangruna kadagiti dadakkel a pamilia.
