BAGUIO CITY – Nainget nga ad-adalen ita ti Municipal Engineering Office ti La Trinidad, Benguet ti plano a panakapalawa ti Municipal Hall.
Sigun kenni Engr. Benedict Pineda, Municipal Engineer, babaen iti daytoy ket napintas ti panakaipatungpal ti plano nangruna ta panggep ti lokal a gobyerno a tallo agingga uppat a kadsaaran ti pagbalinan ti Municipal Hall.
Kinunana a no bilang matungpal ti nasao a plano ket kasapulan a marakrak ti entero a pasdek ti Municipal Hall nangruna ta saanen a natibker ti pundasyon daytoy.
Innayonna a tinawen nga adda ti mailatlatang a pondo para iti nasao a panggep.
Inaklon pay ni Engr. Pineda a nabayag a proseso ti panaka-adal ti plano ngem impasiguradona nga aramidenda ti amin tapnu matungpal daytoy ita nga administrasyon.
Naamuan met iti mayor a P70-M ti kasapulan para iti nasao a plano a paset ti panagsagana ti La Trinidad para iti panagbalinda a siudad.
