BAGUIO CITY – Agpapaimbag ita iti pagagasan ti maysa a lalaki kalpasan a nabagbagsol iti sangwanan ti maysa nga inn sadiay Abanao Street Extension, Baguio City idi kalman.
Nabigbig daytoy a ni Ereberto Nieva Toraldo, 31-anyos, baro, plumber, tubo ti Bicol ken residente ti Green Valley, Baguio City.
Maibasar iti report ti pulisya, nagkaabay iti lamisaan ti grupo ti biktima ken ti grupo dagiti suspek iti maysa a balay-paginuman sadiay Cariño Street, siudad ti Baguio agingga a nagbinnara ti dua a grupo ngem dagus a naanawa dagitoy.
Iti salaysay dagiti testigo, binarsak ti biktima ti maysa kadagiti suspek babaen iti maysa a botelta ti arak.
Nagresulta daytoy iti panangkamat ti grupo dagiti suspek iti biktima agingga iti Abanao Square ken sadiay a binugbug ken binagbagsolda ti biktima.
Nagsagrap ti biktima iti tallo a bagsol iti nagduduma a paset ti bagi daytoy.
