BAGUIO CITY- Nagpalawag ti Philippine Military Academy (PMA) iti panakawaswas ti katulagan ti Cadet Corps, Armed Forces of the Philippines (CCAFP) iti maysa a kooperatiba dagiti laundry services iti Baguio ken Benguet kalpasan nga indanun ti nasao a grupo ti nasao a pakaseknan iti lokal a konseho ti Baguio.
Dinakamat ti grupo iti suratda nga idi pay 2015 a napirmaan ti nasao a katulagan wenno dekadan ti panagserbida iti CCAFP ngem kalpasan a nawaswas ti katulagan ket naaddaan metten iti kontrata ti akademya ken ti maysa a pribado a laundry service a nakabase sadiay Pampanga para iti narugian nga operasyon daytoy iti uneg ti PMA.
Inlawlawag met ni Lt. Col. Maria Elena Esteban, nangibagi iti PMA a ti panakawaswas ti katulaganda iti nasao a kooperatiba ket intunda ti saan a napintas a serbisyo dagitoy.
Dinakamatna a nakaawatda iti reklamo dagiti kadete seknan iti nasao nga isyu ken iti panag-inspeksionda kadagiti walo a laundry services a mangas-asikado kadaigti gargaret dagiti amin a kadete ket nakitada a mismo a narugit, nagulo ken
nadadaelen dagiti pasilidad nga ar-arameten dagiti nasao a laundry services.
Nailanad pay iti resulta ti survey dagitoy kadagiti kadete a 50% kadagitoy ti nangkuna a saanda a mapnek iti serbisyo dagiti nasao a laundry services gaputa saan a kompleto ken naladaw ti panakaisubli dagiti impalabada ken ti pakaseknan iti kinadalus.
Nagresulta daytoy iti panangdesisyon ti PMA a sukatan ti laundry services provider ti akademya tapnu mapasayaat ti serbisyo a maited kadagiti kadete.
Innayon ni Esteban a naduktalanda metlaeng nga awan ti katulagan iti nagbaetan ti CCAFP ken ti maseknan a kooperatiba ken awan ti naited iti akademya a dokumento iti terms of service dagitoy ken awan ti standard cost ti laundry services dagiti kadete.
Impettengna pay a nagbalinda a transparent iti nasao a kooperatiba ken naipaka-ammo iti grupo ti nasao nga addang ti CCAFP
