BAGUIO CITY – Mapnek unay ni PNP chief Dir. Gen. Oscar Albayalde iti taray ti imbestigasyon ti Baguio City Police Office (BCPO) ken Police Regional Office Cordillera iti kaso ti panagmaltrato iti daydi 4th Class Cadet Darwin Dormitorio.
Kinunana a very satisfied daytoy iti performance dagiti imbestigador iti kaso no sadino ket adu pay dagiti agibutbutaktak ti kanayonan nga impormasyon.
Innayonna nga umad-adu pay dagiti rumrumwar a maibagbaga a namaltrato nga addaan koneksion iti kaso ti pimmusay a kadete.
Kabayatanna, kinuna met ni BCPO City Director PCol Allen Rae Co nga ad-adalena ti kaso a murder malaksid iti panaglabsing iti Anti-Hazing Law a maipila kontra kadagiti innem a suspek a bukbuklen ti maysa a 1st Class Cadet, uppat a 3rd Class Cadets ken maysa a 2nd Class Cadet.
Nupay kasta, kinunana nga addan iti prosecutor’s office no anya ti kaskenan a kaso a rumbeng a maipila iti korte kontra kadagiti nasao a suspek.
Innayonna a posible a makasuan metlaeng iti criminal negligence ti dua a medical personnel ti PMA Station Hospital gapu iti biddut a diagnosis kenni Cadet Dormitorio.
Mamati pay daytoy a natibker ti ebidensiya iti kaso a murder gaputa nakitada ti ‘evident premeditation’ kadagiti suspek iti panangmaltrato dagitoy kenni Cadet Dormitorio.
