BAGUIO CITY – Guyguyuguyen ti Regional Mobile Force Battalion (RMFB) – 15 ti Police Regional Office Cordillera (PROCOR) dagiti umili a makipaset iti panagdonar iti nagduduma nga ay-ayam para iti programada a ‘Share a Toy, Share the Joy’ para iti umadanin Paskua.
Sigun kenni PMaj. Lambert Grad, officer-in-charge ti RMFB-15 ti PROCOR, panggep ti programa a makakolektar iti ay-ayam a maipaay kadagiti ubbing kadagiti napili a nasusulinek a lugar sadiay Besao ken Tadian, Mountain Province nga awanan ti bukod nga ay-ayam.
Kinunana nga agbalin a regalo dagitoy kadagiti nasao nga ub-ubbing nangruna ta umadanin ti Paskua.
Nakalukat ti opisinada sadiay sadiay Camp Major Bado Dangwa, La Trinidad, Benguet a mangawat kadagiti donasyon nga ipaay dagiti managtulong nga umili ti rehiyon.
Adda metlaeng ti mabigbig a collection point sadiay Malcolm Square, Baguio City inton Nobyembre 29 agingga 30 kagiddan ti Cordillera-Japan Culture and Arts Festival.
Naamuan a ti Share a Toy, Share the Joy ket joint program ti RMFB-15, PROCOR ken ti Kabataan Aagapay sa Pagtulong sa Inang Bayan (KASAPI).
