Inlawlawag ti Department of Education (DepEd) nga awan ti balakadda nga espesipiko a kolor para iti “alternate uniform” a mabalin nga usaren dagiti mannursuro iti panawen ti tikag.
Kasaruno daytoy ti komento ni France Castro, representative ti Alliance of Concerned Teachers (ACT) Party-list maipapan iti retrato nga inruar ti nasao nga ahensia a mangipakpakita iti sumagmamano a sample collared shirts a white, red ken green.
Pagarup ni Castro nga addaan daytoy ti “political meaning” gapu iti red ken green a kolor ti kampania ti Unteam idi napalabas a 2022 elections.
Nupay kasta, impaganetget ni Michael Poa, undersecretary ti Department of Education nga awan ti balakad ti nasao nga ahensia a nasken a kolor ti uniporme dagiti Teaching ken non-teaching staff.
Sigun pay kenni Poa, maipaayan dagiti manursuro ti kinawaya no ania ti kolor ti DepEd collared shirt a kayatda nga usaren.
