Imbutaktak ni Batangas Rep. Gerville Luistro a dagiti politiko nga innaganan dagiti sigud a Marines nga immawat iti minal-maleta a kuarta ket dagiti politiko a timmakder para iti imbestigasion kontra iti administration ni sigud a President Rodrigo Duterte ken ti impeachmet kontra kenni Vice President Sara Duterte.
Sigun kenni Rep. Luistro, agpapada a dagiti innaganan dagiti 18 a sigud a marines ket dagiti indibidual nga agkidkiddaw iti transparency, accountability ken aktibo a makiparpatisipar iti imbestigasyon kontra iti sigud a presidente ken ti anakna a ni VP Duterte.
Innayonna nga uppatda a miembro ti House prosecution panel a nang-iggem iti impeachment trial ti bise presidente ti nainayon iti listaan dagiti sigud a Marines.
Daytoy ket pakairamanan da Manila Rep. Joel Chua, Mamamayang Liberal party-list Rep. Leila de Lima, ken Bicol Saro Rep. Terry Ridon.
Impagaganet ni Rep. Luistro a ti motibo iti likudan ti affidavit dagiti sigud a Marines ket ti panangdadael iti kridibilidadda bayat ti panagsaganada iti impeachment trial ni VP Sara.
Malaksid kenni Luistro, Chua ken de lima; inakosaran metlaeng dagiti sigud a Marines nga immawat iti minal-maleta a kuarta da Lanao del Sur Rep. Zia Alonto Adiong,Palawan Rep. Jose Alvarez, ken dadduma pay.
Nainget met a pinalibakanda ti alegasion dagiti sigud a Marines.
Impetteng ni Luistro nga aminda a nainaganan ket dagiti mangitaktakder iti posisyonda iti imbestigasion ti 19th Congress ken ti agdama nga impeachment trial kontra kenni VP Sara Duterte.
