BAGUIO CITY – Posible nga aramaten ti lokal a gobierno ti La Trinidad, Benguet ti nabatbati pay nga quick response fund dagitoy para iti COVID-19 response gapu iti agtultuloy a panagngato iti kaso ti virus.
Sigun ken La Trinidad Mayor Romeo Salda, naibusen ti nailatang a pondoda para iti COVID-19 response gapu iti kinaadu ti kaso iti nasao a munisipyo.
Kinunana nga adu unayen ti nagastosda kadagiti naglabas a bulan.
Innayonna pay a naibus metten ti pondoda manipud iti Bayanihan 1 nga inlatang ti nasyonal a gobierno isut gapuna nga agkasapulanda pay iti kanayunan a pondo.
Mainaig iti dayta, kinunana a dumanon iti P440 million ti singasing a pondo ti La Trinidad para iti 2021 nu sadino a dumanon iti P 20 million ti nailatang para iti COVID-19 response.
Inlawlawagna a maaramat dagiti pondo para iti bakuna, taraon ken pagkasapulan dagiti COVID-19 patients, infrastructure projects para iti kanayuonan nga isolation facilities ken PPEs para kadagiti frontliners.
