BAGUIO CITY – Naobserbaran iti panagngato ti populasyon iti probinsiya ti Benguet.
Maibasar iti resulta ti 2020 Census of Population and Housing nga insayangkat ti Philippine Statistics Authority (PSA), dumanon iti 460,683 ti populasyon ti probinsya idi May 1, 2020,bayat a 446,224 ti total population idi tawen 2015 ken 403,944 idi 2010. naamuan a ti annual population of growth rate ti Benguet idi 2015 agingga 2020 ket 0.67 percent bayat a 1.32 percent population growth rate ti nairecord iti period ti tawen 2010 agingga 2020.
Ipaspasimudaag ti nasao a record a maysa a tao ti mainaynayon iti tunggal 100 nga indibidual tunggal tawen.
Sigun ken PSA Benguet Chief Statistical Specialist Imelda Buyucan, sumagmamano a probinsiya ti nakailista iti panagbaba ti populasyon gapu iti migration kalpasan a naapektaranda iti COVID – 19 pandemic.
Kinunana nga adu dagiti nagsubli iti nagtaudan da a probinsiya ken inaklonna a narigatanda a nagkalap iti data gapu iti pandemya
Nupay kasta, nabaelanda latta nga ipalpas daytoy babaen met iti tulong dagiti maseknan nga opisina
Gapu iti dayta, nagyaman ni PSA Regional Director Villafe Alibuyog kadagiti nadumaduma nga stakeholders ken partners a timmulong kadakuada tapnu agballigi ti panangalada ti datus para iti 2020 Census.
