BAGUIO CITY – Balballaagan dagiti otoridad dagiti indibidual a mangungundaway ken addaan intension a manggundaway iti manarimaan a 2020 Census of Population and Housing ditoy rehion Cordillera.
Iti interview ti Bombo Radyo Baguio, inaklon ni Philippine Statistics Authority (PSA) – Statistical Operations and Coordination Division chief Aldrin Federico Bahit Jr. nga adda dagiti manggungundaway iti nasao nga aktibidad ti ahensia babaen iti panagpammarangda nga empleyado ti PSA.
Kinunana a kadawyan a mangiwarwaras iti census forms dagiti agpampammarang nga empleyado ti PSA kadagiti residente nangruna kadagiti nasusulinek a lugar ken ditoy a maalada dagiti personal nga impormasion dagiti umili.
Impettengna a confidential dagiti impormasyon a maal-ala manipud kadagiti residente kas nailanad iti Data Privacy Act of 2012.
Gapu iti daytoy, imbalakadna ti panagannad dagiti umili ken kadagiti laeng lehito nga enumerators ti pagpa-interview-an dagitoy.
Dagiti lehitimo nga enumerators ti PSA ket nakasuotda iti opisyal nga uniporme ti PSA ken nakaimet kadagiti espesyal a forms a dagiti laeng enumerator ken ti maseknan nga indibidual ti makakita kadagiti nailanad nga impormasion.
Impatalged pay ni Bahit a dimmaladan iti nainget a proseso ti panakapili dagiti enumerators sakbay a naiwaras dagitoy kadagiti nagduduma a probinsia.
Dimmalan dagitoy iti serye ti COVID-19 testing tapno maipasigurado ti saan a panakaiwaras ti COVID-19.
