BAGUIO CITY – Ad-adalen ita ti City Environment and Parks Management Office ti posibilidad a maisubli ti panagkalap iti Burnham Lake.
Iti panakiyuman ti Bombo Radyo kenni Cordelia Lacsamana, dadaulo ti nasao nga opisina, kinunana a daytoy ket gaputa over-populated ita dagiti lames iti dan-aw.
Sigun kenkuana, adda ti probisyon iti ordinansa ti siudad a mangipalpalubos iti panaglakap iti nasao a dan-aw.
Dinakamatna a nailanad iti ordinansa a P10 ti babayadan para iti panagkalap iti Burnham Lake.
Innayonna a napintas ti nasao nga addang no ti mapasamak ti fish kill sadiay.
Sigun pay kenkuana, nadalus dagiti tilapia iti Burnham Lake gaputa awan metten ti waste water a sumsumrek sadiay gaputa nadalusan ken nasemento ti igid ti dan-aw.
Nupay kasta, kinuna ni Lacsamana a panunutenda a naimbag dagiti agbalin a pagalagadan gaputa amkenda met a no mailukat para iti panagkalap ket maibus a dagus dagiti lames.
